本田（Honda）S2000，開篷、FR驅動布局、雙座位、輕巧、2公升VTEC高轉型直四引擎夠癲夠勁，
發表至今雖然已接近18年，仍然係好多日本車迷嘅至愛。
本田FR開篷車輕巧兼引擎高轉表現強勁嘅特色，早喺60年代已廣為人知，尤其係歐洲汽車界，
當時嘅S800配容積只有791c.c.嘅直四DOHC引擎，最大馬力70匹/8000rpm（最高轉速可達10000rpm），8000rpm喎！
1967年嘅specs喎！簡直係超曬班，而且佢當年嘅極速有成160km/h，係少數引擎容積少於1公升，但又有咁高極速嘅開篷跑車仔。
S800嘅生產年期好短，由1966年生產至1970年，總產量約11600部。香港曾經有合群行貨輸港。
最近本田英國（Honda UK）分部就喺巿場購入一部1967年度嘅紅色S800，進行大翻新及維修，預計可以喺來年6月嘅英國古活賽車節亮相。
點解要揀部1967年嘅Honda呢？
哦！因為英國喺1967年首次引入四輪本田型號，之前嘅全部都係兩轆，即係機車囉！