而家d友，又窮又多嗜好，又要新又要豪要市區要地鐵要會所但無水！
市趺就想跌多D唔買住，到市升就話有泡沫影響民生想政府出手，
自己睇錯市就要自行負責任.,唔夠水咪下個浪先買囉，
唔好成日走出來呱呱叫啦，呢個世界靠自己架！
「首期一成，一百萬點會唔夠？」
「窮，就要住遠啲，一上車就想住葵芳？」
「咁遲先買？臨渴掘井！」
「點解唔考慮租住先？」
香港年輕人上車難，樓價不斷升，一個豆腐潤單位都要4、5百萬，點買？
尤其一班無父幹無屋企資助嘅人，只靠自己辛辛苦苦返工儲錢，要買樓真係好講毅力！
最近討論區有位80後仁兄就Post話自己畢業做嘢已經10年，儲到100萬，希望同女友買樓預備下年結婚，
不過心儀嘅「新葵芳花園」就由幾個月前嘅430萬升到460萬。
話自己已經一日打份工仍難追大市升勢。
樓主訴完苦，估唔到竟然有一大班人留言指摘樓主，用咩原因，睇睇：
「首期一成，一百萬點會唔夠？」
有唔少人鬧樓主呃人搏同情，係想營造出樓價太癲嘅「假象」，仲話100萬可以夠首期做到按揭，
不過根據按揭公司資料，其實2手樓400萬以上要2至3成首期，仲有裝修、律師費、稅等加加埋埋，無150萬其實唔夠架。
「窮，就要住遠啲，一上車就想住葵芳？」
有人指摘樓主以葵芳地鐵站上蓋嘅物業作為上車之選，係大想頭，「充大頭鬼」，
因為新葵芳花園位環境位置皆屬上佳，加上葵芳已經屬於市區，4百幾萬呢個價錢一啲都唔貴咁話；
得100萬應該只夠買葵興山上啲洋樓咁話。
「咁遲先買？臨渴掘井！」
有人更直接質問樓主點解喺年中低位過一排時唔入市，同埋既然有計劃結婚，何不早早買定，宜家正值高位，當然貴咁話。
不過買樓唔同買棵菜，有幾多人可以肯定幾時係高位幾時低位？宜家去指摘，未免太事後孔明喇。
「點解唔考慮租住先？」
呢個都係好多上咗岸嘅人成日講嘅說話，年輕人一話買唔到樓，就叫人「租住先」，話當年「自己都係租租下先買」，
其實今時今日點同當年，宜家租金已經佔咗收入一大半，仲租住先又點儲到錢買樓？
其實觀乎負評者嘅口吻，其實都係上咗岸買曬樓甚至多層樓收租嘅人，嘗試合理化香港樓市癲嘅事。
例如話樓主「窮，仲想買葵芳？」宜家喺香港有100萬現金都畀人話窮，連葵芳都買唔起，呢件事真係合理？正常？
一群既得利益者，對未上岸嘅朋友種種打擊，其實就好似放工時間，金鐘站月台上咗車嘅朋友，
明明有位仲死唔肯行入去，反過來指摘外面想上車嘅人係貪心。
當世界已經變得唔正常，正常人反而被人覺得係癲佬。