時移世易，喺香港經營生意，尤其是舊有嘅品牌近年都要尋找新出路，連大型連鎖集團都要推出副線，走年青形象。當賣雞的都去賣牛丼同火鍋，7-Eleven轉型做快餐又有咩好驚喎～
梗有一間喺左近嘅7-Eleven原來有間Cafe架！另外仲有2間便利店有早、午餐供應添！
7-Eleven喺金鐘力寶大廈開設首間外賣概念店，拋開便利店外型，食品更多元化。
門口就係收銀，然後就到取餐櫃檯， 當然店內仍然有其他飲品的陳架。
店內首設嘅Noodle Bar其實同車仔面差唔多，有超過20款配料同4款麵隨意配搭，當中包括瑞士雞翼、泰式魚餅、越南扎肉、溫泉蛋、日式叉燒、泡菜等等，仲有唔同湯底可以選擇。
仲有一啲便利店少見嘅小食，例如能量燕麥(加入奇異籽、藜麥)同黑松露醬腸粉。
另一邊仲有新鮮麵包區同熱食烤卷櫃，熱櫃仲有暖湯提供，冬天嘅時候就吸引力大增。
至於7仔飯堂暫時只有鰂魚涌同灣仔分店，提供嘅熟食同現時嘅Hot Spot與別不同，竟然有早、午、下午茶餐！
店門口貼有餐牌，早餐嘅選擇都唔少，中式、西式都有，仲免費配熱飲或豆漿。
最好賣非火腿蛋三文治(單售$16/套餐$18)莫屬！店員手勢純熟，一口氣可以炮製6份三文治。
至於午餐嘅兩餸飯、豬扒飯、肉醬意粉都有供應。
部分食物如豬扒、煎蛋等都是即叫即煮。
其中自選兩餸飯，每日會轉換唔同嘅四款餸，菠蘿生炒骨、紅咖喱炆牛腩、金針雲耳蒸滑雞同西芹雜菌炒肉片都係家常小菜。
三十幾蚊就有交易，喺區內確實係個平民選擇。
7-Eleven
香港鰂魚涌海光街13-15號海光苑地下5及6D號鋪
香港灣仔港灣道25號海港中心地下G6號鋪
午餐供應時間：11am-2:30pm
7-Eleven概念店
金鐘力寶中心1樓2B鋪
營業時間：7:00am-9:00pm(星期一至五)、7:00am-5:00pm(星期六)、星期日及公眾假期休息