據日本傳媒報道，本田汽車喺今年7月26日，正式向歐盟智慧財產權處（European Union Intellectaul Property Office，簡稱EUIPO）成功註冊全新名稱「ZSX」。
ZSX究竟係乜？日本傳媒認為，該款車將會定位於旗艦「NSX」之下，用以往嘅本田跑車陣容去推想，ZSX極可能係S2000嘅接班人。外界對於S2000後繼型號發展嘅揣測，主要分FR（前置引擎後驅）及MR（中置引擎後驅）兩類。
當中又以MR之說最為熾熱，一直有傳本田已落實喺高性能系列嘅動力系統上「一味多吃」，以Civic Type R嘅2公升直四Turbo引擎為基礎 ，最大馬力輸出將不少於310匹及40.8kgm，並裝有摩打補助動力。預計呢款MR四汽缸高性能Honda嘅雛型，將於來年初亮相。