言論出位嘅蘇施黃，日前係商台節目《大玩派》竟狠批香港單車隊戰衣，又用「茂利」形容桌球一哥黃鎮廷，仲話人地『呢啡』唔識著uniform，「我著polo shirt就一定扣最底嗰粒鈕，因為係咁先靚啲，呢個阿乜，黃鎮廷呢，佢係全部『啡』開曬，真係肉酸到呢，可唔可以教嚇佢哋點著uniform呢？」事件令香港前劍擊代表李忠民在fb撰公開信畀佢，更惹來一班運動員及網友洗版狂轟，有人話「人哋做運動，唔係好似佢咁著polo shirt食飯行街拉屎」，亦有人話「自己個style都未攪掂，學人批人著衫，簡直好似乞丐話人無錢！」
而蘇施黃一向得罪人多，稱呼人少，禍從口出嘅事件又點止呢個呀，以下呢幾個經典事件，真係吹脹！
茶包裡的風波
前年蘇施黃係銅鑼灣某酒店High Tea要求兩個茶包，侍應表示要收取兩杯茶價錢，事後佢係fb開帖開名怒轟酒店cheap精又話侍應蠢。
鬧到小店執笠
主持飲食節目，成日鬧到小店執笠，最經典個集係有線年代的《一分鐘真人蘇》，到銅鑼灣一間快餐廳踩場，大罵人地用蒜頭煮菜，又話$34一客豬扒飯太貴，教人哋開店，更大鬧「咁鬼蠢，執咗佢啦！」對住鏡頭的老闆不知如何自處。
黑心撳錢
係now節目《撳錢》中跟劉天賜組隊參加遊戲，疑兩人為獨吞50萬獎金刻意放流料給觀眾，結果逾5,000位觀眾出局，被網民狠批二人「黑心」。
見高抬、見低踩
佢最叻係見高抬、見低踩，成日係專欄到狂踩食店，被指暗中收咗錢，做法同高官一樣。