人到中年，時不時就會係Facebook見到有朋友求婚，或者被求婚嘅Sweet Sweet開心 Share，無論大型花式求婚又好，閉門二人世界跪地求婚都好，求婚嘅標配少不了鮮花同鑽戒。
廣告商話鑽戒代表永恆嘅愛，呢粒戒指除左表情我願意永恆愛你，仲承載左好多功能，鑽戒幾大粒就暗示對方幾有財力，或者願意付出幾多財力去表達對被求婚者嘅誠意，嚴格黎講，鑽戒係一件無實際功能嘅昂貴首飾，花幾萬以至幾十萬，只為博君一笑代表的亦係寵愛。
而呢份見證住誠意同寵愛嘅鑽戒好多時仲有另一個使命，就係戴係被求婚者手上，拍成硬照放上網等Like。一般黎講求婚相、Pre-wedding相，結婚相，第一個BB嘅第一張相都會有好多朋友祝福同Like。網絡年代，每一個Like都見證住我地人生好多重要嘅里程碑。
因 為我係從來唔特別鐘意鑽石或者戴戒指，所以唔特別覺得如果有機會被求婚，對方需要買一隻好貴嘅鑽戒。一來我應該好少會戴，二來我天性大頭蝦，堅擔心戴出街 會整唔見。如果對方話我知佢想用十萬買戒指，我會寧願大家一齊夾份儲一筆願望基金，每年一齊去旅行，或者完成彼此嘅小心願。當然呢一切嘅前提係要有人想向 我求婚先。
身邊有另一半嘅朋友，只有一個同我理念一致。其餘大部份嘅朋友始終覺得求婚有鑽戒係誠意，其中一位朋友更揚言非3卡不嫁，佢覺得 婚姻可能會離異，但收到嘅戒指永遠戴係自己手，對佢而言大大粒鑽戒代表對方給予嘅寵愛同安全感，無論佢幾任性，戒指幾貴都好，只要可以令佢開心，佢老公就 覺得粒鑽戒係有意義的。
求婚需唔需要搭鑽戒，主要睇你遇到的另一半價值觀如何。但問題係一開始，到底係邊個發明求婚要配鑽戒嘅呢？
有 歷史學家話係古埃及嘅墳墓發現可能係最早出現嘅戒指，對於羅馬人而言，婚禮上互贈指環代表對婚姻嘅承諾。戒指有禁戒之意，男女雙方係無名指上佩戴戒指，意 即公開表明其下半生已被預訂。公元9世紀時，教宗尼古拉更頒令，規定男方必須係訂婚儀式上，贈送女方訂婚戒指。中國係晚唐時期，戒指亦已經係男女之間通用 嘅訂婚信物。
而求婚戒指由普通戒指升級成為鑽戒呢個傳統，據說源自於1477年，當時奧地利大公馬克西米連睇中左法國公主瑪麗，因為佢好 靚，所以已經許婚左俾法國王儲都好合理。但馬兄堅信愛係要靠手段爭取，所以搵身邊親信幫手出計仔，最後有人提議佢送鑽石戒指，因為當年鑽石好稀有，代表純 潔、堅硬而永恆的愛情。公主收到鑽戒大喜，好冧冧豬地選擇嫁俾馬兄，自此鑽戒就係鑽石商人保駕護航下，慢慢流傳到世界各地至今，成為求婚嘅標配。
當然傳說係浪漫嘅，現實黎講歷史亦有記載馬兄同瑪麗嘅婚姻其實係政治聯婚，佢娶瑪麗主要係為左���國東部邊境一帶嘅土地，而呢位傳說中開創左用鑽戒求婚嘅男子一生有14個私生子女。
任何關係落到婚姻的日常生活中，都好難保持一輩子的浪漫，甚至好多人未必可以信守承諾同行一輩子。舉起鑽戒的朋友說，或者鑽戒代表的不是永恆，就算將來離婚都好，望到手中鑽戒閃閃發亮的時候，佢記得呢個男人曾經願意係某個瞬間寵愛過佢就夠了。