滕麗名最近頻頻出現大台，兩線劇集同樣有份，而且剛熱播嘅喜劇深受觀眾喜歡，程度直情叫女一嘅胡定欣都無碇企。大家要講滕麗名，都一定要數20年前 從《真情》開始，到之後《陀槍師姐》系列，陳三元一直都係大家鍾意嘅女警妹妹。不過最為人認識一定要數佢同魏駿傑嘅戀情，一直拍拖9年，直至被魏駿傑始亂 終棄，北上娶埋個年輕十幾年嘅老婆！苦主身份嘅滕麗名亦從此消失幕前一段日子，至近年先再現銀幕，角色從以前嘅少女，變成媽媽。不過滕麗名可以深受老中青 觀眾歡迎並非偶然，佢完全演繹出中女將年齡轉化成智慧、成熟，盡顯女人味，所以話「做女人應當似滕麗名」，咁就算唔再係妹妹仔，又有乜好怕喎？
對前度大方
魏駿傑始亂終棄，女人最寶貴最花樣年華嘅9年春青就此白費，但從來未有一個場合聽過滕麗名講半句魏駿傑嘅不是；就算前年魏駿傑位大陸嬌妻疑似偷食，全世界都喺度話佢抵死之時，亦未曾聽見滕麗名半句抱怨、嘲笑、諷刺。呢種女人嘅大方，唔係每一位都做得到架！
為愛情不顧事業
滕麗名自《陀槍》後一炮而紅，成為炙手可熱嘅大台花旦，理應前途大好，不過據傳佢因為顧住同魏駿傑拍拖，反而未全心全意投入拍戲工作，以致聲勢開始滑落，甚至後來跟TVB解約，消失電視圈一斷很長日子。完全展現出女人深愛一位男人之後，成個世界就只有呢位男人呢！
保養得宜
雖然話滕麗名大方得體，深受大家愛戴，不過當然都好大程度因為佢嘅外表吸引力比以前仲有增無減啦！相信大家日日返工放工都見佢唔少豐胸廣告，身材絕不輸蝕一眾新生代少女，而且一副清秀面容仍然未變，外貌身型都無走樣，彷佛仍然係當年嘅「陳三元」。
愛得低調
受過情傷，仲要係全香港人都知，比著你，如果搵到第二個，一定會高調曬幸福啦，話畀人知自己過得好好；但係滕麗名無，唔講都唔知原來佢已經喺2013年下嫁圈外商人，成為幸福少奶奶，不過仍然愛得低調，唔需要向世界向外人證明任何嘢，只要自己知自己幸福就可以了。