空姐一向係為不少人夢想嘅職業，頭頂有光環，唔少人覺得可以周圍去，又有靚靚制服，連理想伴侶職業排名都肯定穩坐頭幾位。不過空姐絕對有苦自己知， 亦不時有行內人會出文指有幾痛苦，人工有幾低，工時有幾長云云。最近空姐嘅Secret Group仲有貼出有著住疑似係制服啲同事，拎住化妝用品影相， 疑似賣廣告，被人問「乜我地可以著住制服賣廣告架咩？！」不過就有人留言撐喎「家家有本難唸的經」，仲話都係因為人工低先以搵外快喎。
其實唔少工種都有類似情況，外表睇落有光環，其實非常惡啃，無想像中咁舒服。美國CareerCast.com就評論過以下幾款「高知名度高事業，不過高壓力而且人工不理想」外人睇落嘅筍工，其實個個錢咬落都係有血有淚。
公關經理
CareerCast指出現今資訊快，渠道多，不論是公司企業還是個人的公關經理每天也要接受海量般的查詢，甚至無時無刻都有機會出現的「關公災難」，比起十年前更加困難同埋壓力極大。不過年薪有大概77萬港元，仍然吸引大量人投身公關。
企業顧問
唔少人覺得做顧問只需要提出建議，有問題才出聲，看似極為優差；然而CareerCast指出公司內部嘅企業顧問經常成為磨心，被形容係破壞員工關係嘅職位。加上大量出差，壓力亦大，一啲都唔輕鬆。年薪平均為61萬港元。
調解員
相 信睇電視近年都經常見到「調解員」呢個名，連政府都鼓勵大家去搵調解公司，唔使乜都要搞到上法庭。而調解員其實要有專業資格，要讀嘅書唔畀做會計、建築 少，不過調解員最後要做嘅事好多隻係雞毛蒜皮，甚至係兩個小朋友爭玩具咁。而且一定會得罪其中一邊，壓力大，而年薪亦唔算吸引，為36萬港元。
廣告創作主管
身為廣告公司的Creative Director，非常威風八面嘅稱號，不過CareerCast就話目前愈來愈多廣告轉向網絡，直接影響成個行業嘅生態，伴隨嘅仲要有網絡廣告嘅數據分析及定位技術，更莫講話本身已經係有開工無收工嘅職業，至於年薪，其實只有約36萬。
辯護律師
無錯，年薪的確去到89萬港元，不過除非你係上到去「大律師」，否則其實係面對超長工作時間，而且大部份律師只係從事文書或上庭律師背後嘅案件研究工作，更加要不時研究新案例同進修，真真正正可以上庭嘅律師少之又少。難怪律師經常埋怨「工作是枯燥而重複」。