今日網上瘋傳一篇名為「傳余文樂、小儀公開戀情，承認相戀」的文章，內容指34歲的樂仔與45歲的小儀相戀！消息一出震驚全城！除了阿樂於IG否認拍拖之外，當事人之一小儀更於電台節目《早霸王》向對方求愛：「我哋一齊啦！」
欣賞小儀識煮住家菜？
該文章爆出小儀終於有新戀情，而對象竟然係男神余文樂！文章繪形繪色道出樂仔心聲：「大家都認識咗好多年，常常都見面，都很了解對方… 覺得對方愈來愈好，所以就一齊了！」又話「我希望大家唔好將她和我之前的女友比較，我好欣賞佢，煮得一手好菜，是我想要的對象」。文中又稱小儀覺得樂仔係自己男神，對方肯接受自己簡直係奇蹟；又話自己年紀都唔細，希望可以組織家庭。寫到似層層，好似睇住二人如何撻著一樣！咁到底係堅定流呢？
樂仔：冇對象先一齊
樂仔今朝九點幾就在IG上載一張似係啱啱瞓醒、滿面鬚根，手放額頭嘅O嘴震驚「床照」，似乎床都未落就大受打擊！佢留言：「今天早上起來，竟然收到很多朋友的訊息，一打開發現全都是問我同樣的問題!!!就連我媽都打來問我，我第一個感覺就是，只能說我真的年紀開始大了，大家真的很擔心我感情沒有著落!!!小儀如果我過幾年都找不到對象的話，我們就真的在一起吧!!!!」嗱，講得出做得到呀！
小儀：我哋一齊啦！
今日小儀跟西瓜及火火主持電台節目《早霸王》，當西瓜讀出余文樂回應之後，眾人即哈哈大笑！火火更笑言：「余文樂終於承認同阮小儀交往！」小儀自high說：「係呀，話我哋公開呀！恭喜我啦！由噚晚半夜到今日我成為網絡大紅人。啲報道將我嘅舊事重提，提我年紀話我dry足六年，我自己都唔記得係六年，之前影過我同其他男伴飲嘢，都冇人當真，但噚晚有段新聞就突然話突發小儀公開戀情。我啲friend話好爆喎，又唔講，依家係咪嗌你樂嫂呀！我先知咩事，之後有萬七個friends sent嚟，後尾連啲唔熟嘅人都問，我覺得好笑嘅，原本噚日收到時都諗住喺我自己facebook同fanspage笑下講下，想多謝嘅，賜個余文樂俾我，金剛都有搵我。噚晚我特登去出段嘢嗰個網睇啲網民回應，啲留言好好笑，又話90歲唔死都有新聞、人生充滿希望姊妹唔好放棄，有啲留言係好勵志，原來我做咗件好事，寫嗰個人搵我嘅相，真心講係靚嘅，我今次賺咗好多，係開心嘅！」
問到有否跟樂仔合作，小儀表示：「有次工作關係睇余文樂打籃球，之後入咗男廁男更衣室，一班籃球員嘅，咁要訪問佢，拍嘢冇合作過。」之後火火問：「如果余文樂真係鍾意你，你點？」小儀甜絲絲說：「呢十年我覺得佢好成熟，今時今日得，佢唔係細我好多，佢往績都鍾意過大個佢嘅姐姐嘅！大哥(森美)喺group度都有問，不過我冇應佢。」對於樂仔在社交平台上回應，小儀順勢向對方求愛：「過幾年，余文樂唔使過幾年，依家啦！我哋一齊啦！搵個伴啦。不過我哋私下係冇交往嘅，原來咁多人替我心急，唔使咁大壓力，順其自然啦。」
阮小儀（英文名：Kitty Yuen，1970年11月23日－）原名阮佩儀，香港商業電台著名節目主持人，亦是香港無線電視（TVB）合約藝員。常合作藝人有森美、金剛、郭晉安等。
阮小儀曾就讀於嘉諾撒聖心書院（Sacred Heart Canossian College），於香港中學會考中取得14分，奪得各1個B級，5個D級及1個F級成績，後升讀香港理工大學設計系。中學時期和立法會議員陳淑莊曾為同學。於1996年加入香港商業電台，初期於廣告部擔任創作工作[1]，在協助黃仲凱（商業二台前總監）演出周日黃昏的搞笑節目《廢話小說》參演阮小儀一角之後獲賞識，轉職為DJ。其後與森美主持《森美變態樂園》，後來公司認為他們合作無間，之後兩人一直都合作主持節目直至現在。2001年開始獨立擔當節目主持，主持《神州大地小儀國》。
多年來，森美常常在節目中取笑小儀的高度及年紀，但兩人依然合作無間。2006年3月，小儀及森美合作主持無線電視綜藝節目《15/16》。其後亦合作主持《千奇百趣》系列。
由2006年4月15日開始，與Donald一同主持周六下午節目《903 id club AiShiTeRu》，及後該節目改為余迪偉及小儀主持。
2009年，小儀在無線電視節目《美女廚房》大熱奪冠，成為第二代美女廚神，其後更推出烹飪書籍《小儀煮飯仔》。
於2012特首選舉期間，小儀被指貌似候選人唐英年之太太郭妤淺，二人甚至於商台直播室一同合照。
2015年小儀與《街坊廚神》系列的拍擋主持金剛拍攝劇集《愛情食物鏈》，監製徐正康更指出劇中角色是為她度身訂做。該劇在2016年初播出，更憑著「魯佳芳」一角令她人氣急升。