「邊會呀，哼，好叻咩？下次我同Tracy自己上！」呢個大小姐又發脾氣。 記得果晚足足請佢食咗兩球哈根大師新出果隻雪糕先肯下下道火。
「行得啦！」史提芬fing住隻濕手行出嚟走廊，係我手上接過一大袋安全套之後向香檳出發。 其實香檳同測試中心嘅距離只不過五分鐘腳程，有時真係唔係好明點解經理係都要咁早就叫我過去做嘢，太陽都未落哂山，男人都未放哂工，姐姐又未開哂閘，大熱天時三十幾度上去做外展都咪話唔辛苦。 香檳得條走廊大，頭中尾三邊樓梯先有DD咁多通風位，但唔係有風吹入嚟嘅話，真係風都無滴。 每次去親做嘢都會濕透哂成件衫返嚟。
「Ken，唔見樓下個白頭看更，快D上去掛嘢啦！」史提芬拉一拉我衫尾，快手走入大廈部電梯，按個8字，直上最高一層。
通常我地每隔一段時間就會係香檳大廈set下D布置，用嚟下Gimmick之餘又可以做下D教育工作，每次擺親都係擺係8樓位置，盡量放係一個男人們個個都會去嘅地方 - 後樓梯。 無他，按經驗，男人上一樓一嘅模式都係慣咗洗樓，而洗樓就多數會係頂樓掃落去，但都唔排除有D超級撒亞人選擇逆流而上，小弟自問無咁好體力行樓梯。
8樓只有後半邊有姐姐仔房，前半部基本上已經完全被丟空。 「喂，史提芬，呢間房個門框歪成咁嘅，您睇下。 」我奇怪。 上次嚟嘅時候，呢幾間房嘅房門只係關上，有條鎖鍊鎖住，唔覺佢個門框有歪到，仲要歪得咁勁，連道門都關唔埋，仲有條幾大嘅罅添。
「我唔記得啦，我好耐都無去過香檳啦。 」史提芬一路行一路講。 「經理話呢度宜家比人收購緊丫嘛，可能係被人整爆都唔奇啦。 」
我有D好奇，但都唔係專登咁望入去，事實上條罅爆得幾特別，我都
「喂，靚仔又嚟啦？」說時遲那時快，Fiona係8樓行緊落嚟。 我地喺7樓向上望，同佢正面交鋒，然後紅都面哂。 Fiona一身OL套裝，胸前開deep V，件白恤衫都唔知有無扣鈕，只係見到一對肉球唧到高高的，目測36D。 迷你短裙好貼身，似係而家好興嘅「摟屌裙」，睇得好清楚佢嘅身形，仲短到show咗一大對黑絲長腿出嚟，最後當然係配返對黑色鬥零高踭。 我偷望咗一下史提芬一眼，佢嘅口水差少少就流到落地。 我鬆佢一踭，提醒佢正經D。
Fiona年約25歲左右，一位我地係香檳接觸開嘅陀地姐姐仔。 幾個月前Fiona見到我地喺度派套，就已經讚我地做得好，無覺得我哋阻住佢做生意之餘，仲好好人咁請我地飲嘢，禮貌上我哋都會拒絕呢啲著數，不過可以見到佢幾支持我哋喺一樓一嘅工作。
「點呀，今日呢身造型OK嗎？」Fiona姣姣哋咁單一單眼，我感覺到塊面突然間超級紅(雖然啲血向下流緊)。 「簡直靚絕添啦Na姐﹗」史提芬第一時間「舌累」飯應。
「Hi，Na姐。 」我好生疏咁叫佢。
男人真係一種視覺動物，靠感觀主導，越靚嘅嘢就越容易主導一切，當然包括埋條J。
「Sorry 呀Na姐，今次又擺嘢上嚟做宣傳，希望無阻住你哋做生意啦！」我好唔好意思咁講。
「傻啦，點會丫，有無生意做同你哋有無擺嘢係無關係嘅，男人要入閘，係無嘢阻到佢地o家，哈。 」Na姐爽快地說。 「其實你哋唔駛怕架噃，擺耐啲都無所謂o家，唔駛下下咁快收返埋。 」
「收埋？」我有啲疑惑。 「我哋一向都唔會收返啲嘢架喎……」
「咦，你個客走咗啦？」我問。
「走咗幾世啦，我見悶，又係閉路電視見到你哋仲係度，咪出嚟搵下你哋囉。 」Fiona喺我手中攞咗個派比嫖客嘅套嚟睇。 「今日幾多人，應該派得好快啦！」
「Na姐，我哋唔係淨係派o架，仲有好多嘢講o架。 」的確，如果佢肯聽，我係會將所有愛滋病知識逐一話比佢哋知。
「係？咁不如你上嚟同我講，我最鍾意聽故仔學嘢o架啦」Fiona笑得好甜，加埋佢嘅打扮真係令人暈得一陣陣。
「嚇？上去？」我反問：「入房？」
「梗係啦，呢度咁熱，上面有冷氣嘛！」Fiona大條道理咁答。
「唔好啦，會阻住您開工o架，而且我地都做緊嘢，唔方便入去！」我有禮貌地婉拒Fiona嘅要求。 事實上，外展守則第六章第五條都清楚寫明：「在工作期間，如非必要，不得進入姐姐仔的房間內。 」我係一個遵守紀律嘅員工。
唔知係咪我睇錯，Fiona嘅眼神閃過一絲絲唔開心。
「不過呢……Na姐，我有個請求。 」我停一停，好誠懇咁問：
「我想睇返上星期你門口走廊嘅閉路電視片段……」
第4章：【CCTV】
20:30 – 香檳大廈B座8樓
雖然話係鳳樓，但未必個個房都有姐姐仔喺度。 不過，佢哋個閉路電視就一定係24-7咁開工。 男人，一係唔上去，一去親就會比人影到，有啲閉路電視唔止影門口，甚至連走廊都影埋。 粗略估計，淨係香檳呢8層樓，已經有過百部閉路電視，情況仲嚴密過中情局或者中南海果啲特務機關。
曾經忽發奇想諗過，如果有人Hack咗入呢啲閉路電視system，cap咗啲片，再開一條「鳳樓頻道」賣比啲師奶，應該好sell
「想睇幾耐之前？」見我哋無反應 (其實反應係有嘅，不過佢睇唔到啫)，Fiona再問。
「唔……一個星期之前嘅記錄有無呀？」我諗咗一陣。
「OK！」Fiona做咗個手勢，然後㩒幾個掣，畫面先跳出藍色，跟住又出現返四格，日期係一個星期前中午時段。
四格畫面都無人。
當日我哋差唔多下晝五點先嚟掛，要fast forward好一段時間。 我企起身走向Fiona側邊，心跳得極快，同佢講不如我自己搞，佢可以坐低休息嚇。
Fiona見唔駛佢幫手，就走咗去床邊玩手機。
用16倍速快轉，好快就過咗五點時段，左下角影住後樓後嘅鏡頭，已經見到有幅圖畫，明顯地快轉時跳過咗我哋掛畫嘅時段。
我㩒play掣，睇嚇八點嘅情況。 人來人往，其實都有幾多人停低喺幅畫前面睇我哋嘅嘢，覺得都有啲安慰。 屌丫! Fiona淨係著住內衣衭走出嚟望咗兩望，然後就返入房。
十點左右，走廊開始疏落，但仍有部份客人企喺唔同單位前等佢哋心儀嘅姐姐仔。
「咦，呢個係咪樓下個白頭看更阿伯呀？」史提芬問。
「好似係，睇下先。 」我望實個阿伯喺