台灣女神林心如昨日與男星霍建華在峇里舉行千萬婚禮，正式成為夫妻！其實心如之前一直都傳懷有身孕，所以昨著起婚紗時上圍明顯升Cup，連好姊妹舒淇都忍唔住大讚：「雖來去匆匆，但看到妳這麼性感，也值了，Love u！」另據知心如在席上忍唔住對朋友透露風聲，話好快會係一家三口！而心如與老公今日返回台灣時，腹部明顯凸起，似乎快將有好消息公布！
心如昨日唔係著婚紗時，都係以鬆身衣服為主，而大部分官方發放的相片都刻意遮肚。而喺昨晚婚宴上，有賓客祝心如早生貴子時，之前對懷孕一事冇透露過半點風聲的心如竟然忍唔住漏咗口風話：「謝謝，很快就會一家三口了。」唔知心如係想話自己同老公會盡快努力造人，還是已經造人成功呢？
心如著住性感婚紗曬事業線，舒淇都忍唔住要讚好！唔通係有孕在身的效果？
今日心如同老公霍建華離開峇里返回台灣，心如見到機場滿布記者似乎甚感驚訝。佢今日以一身T-shirt加鬆身工人褲的casual打扮示人，由多個角度都睇得出腹部明顯凸起，似乎好快會有好消息公布喎！
經過昨日一整日的婚禮，心如與霍建華都難掩疲態，不過兩人依然滿面笑容，大方接受傳媒。雖然心如冇親口承認有喜，不過其實佢個肚，都話咗答案俾大家知啦！