新居收樓時由於距離我地舊居租約完只有不到兩個月時間，而且我地裝修連訂造傢俱budget亦想係15萬以下，所以係搵裝修設計公司方面都唔係咁容易，不過好好彩因有熟人介紹下搵到今次裝修個師父，結果成功係兩個月時間內完成哂所有工程，而且budget仲比原先打算平，預計嘅budget除左夠裝修連訂造全屋傢俱外，仲可以換哂三部分體式冷氣
新居買入時由於保養得都唔錯，廚房我地只做左小小翻新，冇乜改動。 全屋地磚亦都保留，只重新補上地腳線。
廁所就全個拆左，換哂d磚同改做企虹，d磚同潔具我係同師父一齊返內地揀嘅，做出黎效果好滿意，老婆特別喜歡個按摩花灑同牆身嘅全身鏡
由於將軍澳比較潮濕，師父建議我地唔好貼牆紙，所以我地全屋都係用白色油漆，客廳配上黑框掛相感覺都唔錯，燈制就換哂銀灰色&飯廳組合櫃果個掛牆鐵架係師父係香港訂造，雖然儲物空間唔夠c字櫃咁多，不過用黎figure就非常好
我同太太都未有小朋友，但為左預備定未來可能有新成員加入，所以細房並冇做太多傢俱，只做了一個窗台書檯，同埋安左一個掛牆架。未來有新成員加入都唔駛有太大改動，只需增添小朋友傢俬
新居入面我地最鐘意間主人房，本身已有衣櫃位，裝完六呎長嘅衣櫃已經夠哂擺野，所以我地都冇造地台，留返多d走動空間。另外除左床底有儲物位，由於我地張床褥都比較高，所以我地都係床邊做左一層櫃桶儲物又可以作為腳踏方便上落床
新居已入伙半年，不過一直都冇時間分享裝修嘅相，不過裝修前都係呢度參考左好多版友嘅設計同裝修分享，令到我地新居裝修時做到好啱我地嘅設計。雖然我地新居嘅裝修都唔算好特別，不過都覺得應該分享一下
單位相片