早排推出新靚聲碟《鏡像》的英皇歌手泳兒，為配合新歌《浮沙之路》拍MV，苦練空中瑜伽三個月，演出有板有眼，亦將身段線條Keep得更fit。近日，泳兒與拍拖5年的髮型師男友Ziv感情升溫，搬去跑馬地同居試婚。日前下午，夾爆手指要養傷唞唞的Ziv孖女友搭巴士迫港鐵，過海去西九龍睇傢俬。當日啡髮泳兒出入披住長黑色褸，睇見都流汗。見她落巴士樓梯時，33D激凸豐滿上圍跌蕩而出。包到冚，無非想密冚美好身材，低調啲啫！
33歲的英皇小花泳兒，早前因被業主迫遷需另覓居所，月前順理成章由北角半山搬到跑馬地與髮型師男友Ziv同居試婚。惜上月尾搬屋大日子，男友Ziv與貨車司機搬衣櫃時，不慎被夾爆右手手指，要入院縫十四針兼停工半個月，搞到女友勁谷氣。
同居半個月，日前周日下午四時許，淡妝泳兒和男友由愛巢出發，先搭城巴往中環置地廣場，再轉港鐵去西九的文化創意新地標D2 Place行街街。熱戀情侶搭巴士揀後排，約二十分鐘車程，兩小口子都好少傾談，各自玩手機。到站時，見穿白裙、拎住手機及棗紅色新款JELLY TOYBOY手挽袋的泳兒匆匆下車，此時外套揚開，驚見背心仔下33D豐乳險破衫而出，胸大腰幼，非常震撼。
睇沙發 無幫襯
其後二人並肩行去迫港鐵。初時車廂超多人，Ziv以高大身軀遮擋嬌小女友。之後乘客相繼下車，泳兒就轉個舒服企位，挨實玻璃與男友share睇手機。幾經轉折，終於嚟到荔枝角站的D2 Place。兩人先在創意市集行逛，Ziv在香薰攤檔瀏覽多時，不過都係齋睇無買。兜完市集，二人再上四樓睇家具，連體揀沙發及擺設等，行足一個鐘，都係無幫襯。時近八時許，情侶搭車連行街消磨半日都係時候去搵食醫肚，然後再慢慢搭車返愛巢。
超罕曬料
入行10年的泳兒專賣靚聲，但一向係有料之人，早年開騷曾激罕曬身材，物以稀為貴呢！