話說，今朝我未返到公司，老闆行咗出去Reception。」
「莉莉妹牙，我想問做乜呢幾日都有貨返？乜我哋有訂單咩？」老闆指著堆慨門口堆貨。
「牙你老…」莉莉一抬起頭：「老闆系啊，啲貨全部系藍橙仔嫁。」莉莉指一指我抬底塞滿另一堆貨。
於是，我連早餐都未食，就畀老闆召咗入房。
「藍橙仔，你系咪好似Kelvin仔咁訂錯嘢，點解台底咁多貨？我開過黎睇全部都系頸巾黎，我哋公司幾時有出頸巾我唔知慨？」老闆以為咁樣反問好有霸氣，其實聽得多都幾憨…
「唔系啊老闆，系傻仔先會訂錯嘢。」呢個時候老闆探頭望一望Kelvin仔，佢又同部影印機耍緊花槍。幾乎每日，佢用親部影印機都會壞，我覺得Kelvin仔成日OT，佢同部影印機一定有段不可告人慨關係。
老闆點一點頭，認同我講慨野，又問：「咁你台底堆頸巾系咩黎？」
「老實講，呢件可能系我人生中做得最錯慨一件事。老闆你除咗同你老婆結婚之外，人生最後悔系乜？」
「請咗你。」老闆答得斬釘截鐵，我哋Dead Air咗十幾秒。
「咳…我最後悔慨，就系教識我女朋友玩淘寶…我而家幾乎每隔一個星期就好似過一次聖誕節咁。」
「聖誕節？即系咩？」
「就會收到淘寶寄黎公司慨禮物，但你都有眼睇，天氣只不過系凍咗少少，我女朋友就即刻買咗五條頸巾，我懷疑佢前世都唔知系咪長頸鹿黎。」
跟住我又話：「不過最恐怖慨系，女朋友為咗令我唔發脾氣，每次都會買埋禮物畀我…你知唔知，用自己慨錢買禮物畀自己，每星期一次，個心情有幾咁複雜…」
「…」老闆摸一摸佢唇上面啲胡沉思，突然又話：「咁又點啊？！咁就可以當公司系淘寶收集站嫁喇！？我叫莉莉以後除咗公司貨之外，唔准收其他速遞！」
「你玩到咁絕，信唔信我下次等老闆娘上黎公司，我教佢玩淘寶…」
「……」老闆打咗個冷震，然後話：「以後收好啲貨，唔好堆曬喺門口阻住通道啊！」
「咁我出返去做嘢先，天氣凍喇，呢條頸巾送畀你。」
估唔到，老闆仔平時系威系勢，原來都系一個怕老婆淘寶慨男人。