小弟今年26歲，但只係經歷過二次戀愛，一次係讀中五個年開始，但小弟成績唔好，
中五就無再讀上去，而佢就順利讀上去，之後慢慢覺得我地之間距離愈來愈遠，就分左手，
完全不涉及第三者。之後經歷左二年既空白期，小弟是讀ive既學徒計劃出身，是一名維修人員，依家係一間物業管理公司做工程人員，因為都有一定經驗，依家工資都有萬八蚊，都拿左幾個中工牌，本來我覺得我自己生命裏唔需要愛情，認為自己工資基本上夠養到自己，
每個月俾三千蚊家用來回報屋企人就已經足夠，但真係敵唔過節日的氣氛，次次去街，都係得自己或者係同性朋友，平時都無野，但一到情人節或者其他大時大節，見到街度情侶好開心咁一齊，個心好似特別難受同寂寞，直到大約二年前，我係一個交友網站認識到佢，最初都係玩玩下心態同佢傾計，
但愈傾愈好傾，大約傾左一個月，我問佢可唔可以約出來見面，佢話可以，個種興奮心情真係好爽，但一約左出來，我見到既佢同網上見到既相分別都幾大，臉上都幾多暗瘡同身形都幾肥，我地就去左一間日本餐廳吃野，佢主動問我係唔係介意佢身形，我當然唔會直接講話介意，
我就幾正義咁話我鐘意既係你性格同你既人，身形我唔太重視，咁由個日開始，我地就開始見面多左好多，因為大家放工同放假時間都差唔多，好容易就約到見面，最初佢成日都有講佢自己樣唔得，身形又肥，都好自卑，我就同佢講，我可以陪你去跑步減肥，
臉上暗瘡可以去美容院做療程，個時我真係好有決心，每日放工，都約佢去運動場或者去跑單車徑，幫佢俾左接近五萬蚊既美容療程，開始慢慢真係見到成果，佢身形真係美觀左，體重真係減左好多，臉上暗瘡少左好多，暗瘡印都淡左好多，隻腳由之前象腿變到正常左，
我開始慢慢真係覺得佢好睇左好多，之前我同佢交往，覺得有個人愛我，唔離開我，有人陪出街吃下飯，仲要求咁多仲咩呢？真係真心鐘意佢性格，同佢一齊真係好開心，依家佢變好睇左，之後佢仲學人整韓妝，買衫都買幾潮的同幾可愛同幾性 感的衫，慢慢覺得同佢出街好威，個人好有自信好開心。但慢慢悲慘事情發生係我身上，佢開始唔鐘意吃平民野，鐘意吃比較高級餐廳，去酒店吃自助餐，跟住我有同佢講話不如唔好成日吃貴野，
但佢就發我脾氣，話我小器，唔捨得駛錢係佢身上，我仲同佢去日本同韓國玩，基本上所有駛費都係我俾，慢慢我既儲蓄就愈來愈少，但我就安慰自己，既然我都當佢係我既另一伴，這些錢遲早都用係佢身上，起碼我覺得當時我係開心既就已經足夠，但最慘情既事都係要發生係我身上，大約二個月前，佢好似慢慢唔想理我，我想約佢出來，佢就話忙，話要加班，屋企有事，去飲喜酒等等理由推左我約佢出來，我有次已經好似乞丐咁想約佢出來，
話我地已經成個月無見，我好想見到你，但換來的是冷淡回應，哦，我個心慢慢好驚，直到一個星期前，佢終於坦白回應我，發左張相過來，佢既樣同另一個男人既合照，話佢已經對我沒有感覺，想我唔好去再煩佢，當時我個心好痛，眼淚係咁流，我真係咁大個仔未試過喊得咁勁，
我知道就算我講咩野我都無辦法留住佢，我仲好偉大咁同佢講，如果個男人真係俾到你幸福，我會祝福你的，但佢一定唔知我既心係有幾咁痛，依家既我做咩野都失去動力咁，吃飯無胃口，做野無心機，可能到依家我都習慣唔到無左佢。可能我之後都唔識去愛其他人