最近睇住California健身中心面臨倒閉嘅新聞，最精彩唔係跟進佢幾時執，而係一眾苦主嘅百態，多得各大報章傳媒，為大家帶出一個又一個嘅苦主故事，例如「子債父還」代簽咗一大筆數嘅阿仔去做健身嘅老豆，結果最後簽咗90萬。另外就係因為有女教練幫佢拉筋，而毅然簽咗15萬嘅24歲男人，仲話簽之前見到健身中心好多靚仔靚女，令佢最後忍唔住簽咗，而家有機會破產，但之後竟然約唔到女教練，而且女教練數目仲愈來愈少！真係忍唔住想問一句：「先生你想健身定想去按摩？」美人計一向老土，但係又大把人繼續中招，男人嚟講，對住靚女真係個腦都停止運作，以下係香港最常見嘅美人計，唔知大家又聽過幾多？
Msg搵你做Facial
最近好多時出現，無啦啦有位靚女會FB或Whatsapp畀你，話自己「亂Add」，「做個朋友」之類，然後就借頭借路叫你去做Facial，有時仲會錄埋語音，當然係超級嬌嗲聲啦。佢哋仲會講到好平，$100有找，但係如果你真係上到去喇喎，就會引你簽更多其他Package，隨時十萬八萬架。
倫敦金／傳銷
凡係呢類金融騙案，又或者要上線下線嘅傳銷模式，總會有好多靚女在其中，通常都會穿著性 感OL打扮，一方面令男人更易被氹而落搭；再者，營造一個心理錯覺，認為只要成功上位，就可以擁有無數美女為你工作，不其然就會心雄，失去正常思考能力。
裸聊勒索
網上騙案更加離譜，唔少男仔上到網，原本怕醜仔都突然變情聖（覺得自己係），騙徒就利用呢點，先同男仔成為網上情侶，繼而引誘佢哋除衫裸聊，當然就會拍低當時情況，隨後可以勒索啦。最慘嘅係，好多時你以為真係有個靚女同你Chat咩，其實騙徒係男人嚟架！
一夜 情變強姦
有唔少男人成日以為自己好靚仔，迷倒萬千少女，去到夜場即時孔雀開屏，結果真係有女士主動埋身，以為有嘢食？錯喇，原來係故意同你發生一夜 情，仲要引你唔戴安全套，之後第二朝就話你強姦佢，仲要無戴套，基本上一驗就實死，再勒索。