我係一位20歲嘅學生，愛上咗一個大我十年而且已經結咗婚嘅女仔
依家哩個情況...我覺得我自已應該叫做「第三者」
哩件事一直都唔係好敢同身邊嘅人講太多，唯有幾位守得秘密嘅朋友，我怕比人誤會，亦都怕會唔小心傳入屋企人耳邊，我怕到時點講都講唔清...
自已從來都冇諗過會遇到咁嘅事，愛上一個大自已咁多嘅女性，而且已經結咗婚...
我想喺哩度簡單講一下我同佢嘅事，希望想知道大家嘅睇法，因為可能心理年齡嘅問題，幾個男性同輩朋友都唔係咁認真聽我講，甚至可以用嚟講笑，講出一啲好難聽嘅說話，例如咩「人妻殺手」、「床上爽過就夠」之類之類，希望大家可以唔好咁樣講得太難聽...
一開始我想先講一件事，我知道好多人睇完之後都會覺得佢呃緊我，但對我嚟講，喺依家嘅哩一刻，我完完全全絕對相信佢...
因為自已真係好愛佢，而且會因為自已唔相信佢而覺得自已對佢唔住...
點都好，我從最初開始認識講起...
我基本上長期都喺外國讀書，上年8月嘅時候認識咗哩位朋友嘅朋友 -- 佢，哩個詳細係點樣我就唔想多講，總之就係唔多熟，最後互相交換咗Line
佢係香港人，好快就返咗香港，而我繼續留喺外地讀書
我其實初初冇認真同佢傾過乜嘢，純粹打過下招呼，直到有一晚我喺Line度搵佢，唔太記得點樣就開始傾咗好耐計，大家都覺得大家幾好傾，幾傾得埋
然後從嗰晚開始我哋就差唔多成日都會同佢互text，而我嗰時嘅時區同佢相差好少
而嗰個慢慢個程度係去到早上講早晨開始，到夜晚講晚安，唔知點解乜都可以傾一餐
當然我上堂嘅時間唔講得，但講開先知道佢原來冇返工，所以都好得閒
佢話比我知佢結咗婚同佢老公一齊往，加上屋企有一個工人姐姐，所以自已基本上都冇乜嘢做
嗰時佢冇同我講太多佢背景，不過慢慢知道佢之前嗰份工做服裝設計，不過因為個BOSS變態壓力好大，所以幾年之後辭咗冇做，佢之前仲有另外兩、三設計，不過哩次搞到個人有啲抑鬱所以停咗冇工作有差唔多半年
之後我哋日日都keep住聯絡，佢喺屋企一個人悶，而我剛剛到哩度讀書，自已一個住，好快又會走，都冇乜幾個朋友，大家一直都陪住大家，好快我哋就覺得有大家有哩個朋友真係好好，陪住唔駛悶
8月尾我終於有時間返咗香港5,6日，大家都好開心，然後至少有3日時間都約大家出嚟行下街，睇下玩下
好快我就離開香港，去咗有十幾個鐘時差嘅地方繼續讀書
大家雖然有咗時差嘅問題，但係大家得閒嘅時候盡可能都會keep住傾，我從來都未試過同任何人可以咁樣傾，真係剛好佢唔駛返工喂個情況先乎合到...
身邊突然多咗一個可以成日都陪住自已嘅朋友，我覺得好驚，好唔現實
正常朋友同學約出嚟食下玩下，「成日約」已經係幾老友，去到無時無刻都可以有時間留比我陪我真係從來都未試過
但當習慣咗身邊有一個咁嘅存在嘅時候，我好想要留住哩個朋友，我好想有人可以咁樣陪住，或者以前未曾有過哩種存在嘅時候我完全冇咁嘅諗法，但不知不覺間就變得比以前更怕孤獨，怕自已一個人
自已雖然見過佢幾次面，但唔係容易相信人嘅一個人，同埋好多時候諗法都好負面，有兩、三個月時間我都不斷喺度諗，會唔會好快失去佢哩一個存在，我變得好驚好冇安全感
但佢一直喺我身邊話我知只要佢可以都會陪到我，佢都有過好多好好嘅朋友，可以到哩個地步，不過依家大家都要忙生活喇
同時間其實佢都同我講我對佢都好重要，如果唔係我陪住佢，佢會好悶
慢慢開始好多嘢唔會同其他人講，唔會同佢老公講嘅嘢，都會同我講，各種煩惱同情感，認識咗三個幾月，大家不知不覺間已經成為咗大家嘅心靈支柱，好好嘅知已，係咪好快...?
喺哩個時候，對於我嚟講存在感好低嘅一個人，佢嘅老公就出現介入...
我簡單講一下佢同佢老公當時嘅情況，依家講嘅嘢並唔係我當時知道嘅所有嘢，嗰時我並唔知道太多時候，依家講嘅係現在我所知道嘅當時情況...
佢老公比佢大8年，佢出嚟做嘢冇耐大家就已經同居，嗰時佢哋並唔係話真係好鐘意大家，覺得嘗試下又OK所以就繼續走咗落去
初初兩、三年大家都有甜蜜嘅，但慢慢佢就發現其實喺溝通方式上，對愛嘅觀點上，大家都好唔相同，反反覆覆咗五、六年，不斷都磨合緊
我舉一下例子，佢認為佢老公唔緊張佢，佢一個人去外地工作，病哂，佢媽媽同工人姐姐都有打電話問候佢，但佢老公一句都冇關心過
佢最後嗰份工因為工作需要，要做到一日24小時on call，但無論如何都會抽時間或搵機會留比兩個人，而佢老公就冇乜交帶，有時候話咗幾時幾點點樣，到最後可能唔會通知就突然之間話要陪朋友
哩啲之類嘅原因佢覺得佢同佢老公溝通做唔到心靈上嘅交流，連佢老公諗乜都唔會點同佢講
而喺我眼中，我覺得係佢老公對人際溝通方面上比較馬虎同走捷徑，例如有時候好簡單嘅一啲生活嘢都要講大話，需要冇傷害到任何人，但其實又何必唔好好解釋清楚呢
而且佢老公覺得佢一直都係無理取鬧嘅狀態，覺得佢唔成熟，亦都做唔到老婆嘅本份
最可怕嘅係，佢老公一直以嚟嘅解決兩個人溝通問題嘅方式係由佢自已一個鬧情緒，根本冇諗過要認真解決，因為認為問題就係出在佢身上，所以只要佢冇問題就成件事都冇問題
總之，嗰陣時佢同佢老公嘅關系就係唔係幾好，哩個唔係幾好嘅狀態已經五、六年，佢哩幾年嚟不斷嘗試提出問題，但佢老公都冇正面面對過，最多唔出聲，所以佢同佢老公都相處得有啲辛苦
咁當然同時間日常生活都係保留住小溫馨嘅，佢屋企嘅工人姐姐由佢老公嘅父母在生時開始照顧佢哋，都已經十幾年，成日都喺屋企嘅佢同工人姐姐關系好好，似親生母女，而且佢唔想比屋企人知道大多佢同佢老公相處得唔係幾好嘅事，怕佢哋屋企人對佢老公有太負面嘅印象，所以好多時候睇得最清楚嘅就係工人姐姐
其實當中依然包含唔少有關佢老公嘅壞習慣，好多好後期佢先同我講，哩度暫時唔講住
講返認識幾個月嘅時候，佢老公介入...
佢有同身邊嘅好朋友，母親，工人姐姐同佢老公講過我嘅存在
「認識咗一個諗嘢OK成熟，喺外國讀緊書嘅男仔，大家好好傾，做咗好朋友」
因為佢成日都拎住部電話同我text，所以佢老公好唔鐘意，覺得唔尊重佢
所以慢慢當佢同佢老公相處嘅時候，我哋都會避開，因為知道佢老公唔係幾鐘意我，咁我覺得都OK嘅，因為我都想佢哋可以好好相處，嗰時我知道有關佢哋溝通問題，但唔知道太詳細，但我好想我哩個朋友可以好
直到依家我諗返起，再聽過一位前輩講嘅說話，其實我做緊嘅嘢就正正係佢老公做唔到嘅嘢，唔係話成日都傾住計，而係大家可以好好咁溝通，分享各種事情，心靈交流，所以當佢老公知道有我哩個存在的確會有危機感，有關危機感嘅程度，後面少少再講...
因為時差，亦因為自已同佢相處嘅時間開始慢慢減少，慢慢就開始覺得有壓迫感，亦都愈嚟愈感覺到哩個隨時都可以陪伴到自已嘅朋友嘅重要性，加上自已成日都好冇安全感嘅因素，我內心多咗一種可能係慾望嘅嘢，到依家都未可以完全解釋到比自已知點解...
我好想同佢表達，佢當我嚟講係好重要好重要嘅存在，雖然佢一直都係電話嘅另一邊，但佢的確陪伴住我經過咗各種唔同嘅事，第一個可以咁close嘅存在，心靈伴侶，如果冇咗哩個咩都可以分享嘅存在，生活就會好無趣
而同時間，我亦都好想佢可以話比我知，我對佢嚟講都係好重要，就算我知道係事實，但係我亦都好想聽到佢親自同我講，自已安全感好弱好弱，因為對住佢我可以話已經打開咗90%嘅內心世界，從來我都唔敢對其他人咁做，喺佢面前好冇保護，所以都幾驚，但亦想留住佢哩個可以close到咁嘅存在
我好想表達佢對我好重要哩樣嘢，而我哋嘅言語表達就用咗「我愛你」哩三個字
喺英文喺講同朋友或親人講I love you可能係好正常，但至少嚟香港社會嚟講，「我愛你」係指愛情嘅愛，其實我從來都冇認真有過女朋友，嗰時我自已並唔知道自已對佢嘅感受係咪對愛情嘅喜歡，不過我有一個指標，就係當時同時間我追求緊一位女同學，感覺的確係唔一樣，所以我認為係友愛嘅愛
我同佢都好明白，大家講緊嘅係友愛嘅愛，所以都覺得冇乜所謂，大家亦冇諗過要向愛情方面發展，嗰時候嘅諗法係好想同哩個咁好嘅心靈伴侶保持關系，大概都係人生上其中一個幸福嘅因素
但好明顯嘅係，事實上大家都唔會明白，見到「我愛你」就會聯想到情情愛愛
當喺11月嘅時候，佢老公偷睇佢部手機，見到我哋啲好親密嘅「你愛我我愛你」對話
然後嗰日就返屋企發嬲，佢同佢老公就一連幾日都不斷傾，大家情緒都好差
連同之前佢哋兩個本身已經存在嘅問題一齊 決定一齊解決哂佢
而我依然都係嗰個心態，想要佢同佢老公好，其他問題我並唔太清楚，但至少我同佢係清白嘅，我要解釋清楚，希望可以幫到佢
然後抽咗一個時間，我、佢同佢老公三個人，三人會議，打咗一個電話
我喺而話入面解釋返究竟點解會用到嗰啲字詞，對於我同佢之間又係咩意思，最後佢老公話明白，而且依家問題已經唔喺哩件事身上，佢哋之間嘅其他問題，有關我同佢嘅事佢老公話已經覺得冇嘢，當然好快當日就發現佢老公並唔係真係咁諗，其實之後一直都好介懷
其實我都明白嘅，比著我都會咁諗...
而經過哩件事之後，佢老公同佢講話想我同佢斷絕來往，唔好聯絡，到我12月有兩個幾星期假可以返香港，諗住可以約佢出嚟玩下，佢老公知道我返嚟之後，都唔比我同佢見面，話至少等到佢老公同佢嘅婚姻問題解決咗先，幾個月之後或者等到我下次再返嚟先算
我好擔心會失去佢哩個朋友，但佢同我講唔駛驚，無論如何都唔會放棄我哋嘅關系，就算要背住佢老公，都會偷偷地text我
我12月返到嚟嘅時候，我哋一直都忍住冇見到面，無論大家剛剛相隔只有幾公里，正正就要同自已證明清白，亦都唔想第日諗返起呃佢老公咁過份而覺得唔開心
但除咗text，哩段時間開始我哋多咗打電話，每日避開佢老公返工時間去傾計，唔明白點解交個朋友都要咁奇怪，明明冇做錯事
大家都好掛住大家，心入面嘅壓抑感亦都好大好大，佢嘗試親手做啲小手工物比我，可以日日帶住喺身，希望我可以放鬆啲心情
不過大家相方嘅壓抑感差不多已經到頂點，我亦都曾經提出過不如大家關系降一下溫，可能會好啲，其實自已亦都好清楚根本做唔到，亦都好辛苦，但我好蠢咁樣提咗出嚟，不如絕交...
佢好傷心好傷心，見到佢咁我同時亦都好心痛，佢喊到停唔到，問我係咪一定要咁做，係要放開佢，我覺得自已做錯事，唔應該因為咁樣而放棄一個咁重視我嘅朋友，我答應佢以後都唔會再講哩種說話，就算到時候自已有咗另一伴都好，都會好好同另一半解釋同介紹比另一半，哩一世都會好好陪佢
直到12嘅最後，過咗聖誕節，要離開香港，我哋都冇見過一面，大家都好傷心，然後我就搭飛機返返去
喺12月嘅時候開始用通話嘅習慣並冇改變，我離開香港之後，依然一直有時間就聯絡
不過經過咗12月嘅事之後，我內心開始出現咗疑惑，究竟我係咪鐘意咗佢，究竟係咪愛上咗佢
原本因為佢老公而要減少聯絡嘅原因而覺得壓抑，慢慢開始仲多咗種妒忌嘅感覺，覺得既然佢親口話我咁重要，點解我一直都要就住佢老公？
哩個諗法真係好恐怖，亦都好情緒化，一啲都唔理性，因為人哋係佢老公嚟㗎嘛大佬呀！我嘅思緒不斷喺理性同唔理性之間遊走
我有問過佢，我好似有鐘意咗佢嘅錯覺，我係咪開始脫軌...
剛剛開始佢解釋話其實當異性朋友去到好close嘅時候都有機會會咁，唔一定係，但後來一啲諗法同情緒解答咗哩個問題，我真係鐘意咗佢
或者冇同佢一齊經歷過嗰種咁壓抑嘅階段，唔會有哩個變化，但我唔係想搵藉口，我知道自已的確愛上咗一個唔應該愛上嘅人
真真正正自已願意面對自已嘅諗法，同話比佢知我鐘意咗佢嘅時候係喺1月
當時12月佢同佢老公之間發生過嘅嘢喺1月並未完結，佢同佢老公一直keep住都有傾緊，討論緊
當然態度依然都係認為佢有錯，而佢老公自已認為自已已經好努力做好到佢想要嘅方向
我對佢老公比較主觀嘅諗法係，有時候並唔係話要打幾多次電話問候，要點體貼之類之類
其實如果你重視一個人，愛一個人，會係想先理解佢嘅需要，並唔係自已認為係A，自已做咗A之後就話自已落咗好多功夫
因為你唔知道嘅話，情有可願，但點解連去用少少時間去理解嘅心態都冇，一直要以自已認為係咁嘅嗰套去做呢？咁樣無論下幾多功夫都唔代表係對對方好，理解唔可以馬虎...