《溏心風暴》話開拍第3集，但係以大台現有卡士，想重現程亮（林峯）同常在心（嘉欣BB)呢啲經典就難啲，不過唔使驚！我已經諗好一個以大台現有演員做骨幹嘅劇情大綱。
套劇叫《溏心風暴之四個女仔三隻鮑》，今集會玩呢期最興嘅不死人，不死人就由真・元華主演。
《溏心風暴》第一集講賣鮑魚，第二集講賣月餅，今集撈埋一碟，賣鮑魚皮蛋月餅，夠哂溏心又創新過創科局。同譚仔有三哥分家一樣，元華同細佬（鄭嘉穎飾）分別都有一間海味舖，元華果間叫「一哥鮑魚」，鄭嘉穎果間叫「一線鮑魚」，熱線係218五個邢。
主題曲會由吳若希主唱，叫《越腍越愛》，唱出賣鮑魚不死人心聲 － 「無懼世事變改，還是越腍越愛⋯⋯」，仲將會喺套劇播出前兩個月開始，每晚新聞時段前代替國歌熱播。
故事由元華同鄭嘉穎喺 「夜吾夜」吹水，見到殭同皮蛋，就靈機一觸，話「不如搵皮蛋酸薑加鮑魚整月餅丫笨」，於是開始好似瀨尿牛丸咁嘅創業之旅，但係上市之後因為爭做「鮑魚男神」呢個稱號，搞到鬧不和分家。
感情線方面，元華有兩個老婆，分別係金燕玲同關菊英，但由於兩位夫人已經come out咗成為sheshe，所以元華好寂寞。呢個時候，新人蔡思貝又要啟動「蔡思貝模式」，佢入咗「一哥鮑魚」做新丁，負責曬鮑魚（佢就係《全力扣殺》傳說中曬鮑魚阿婆個女），但基於佢「新人、冇腦、無禮貌繼而瀨嘢」嘅慣例，第一集就會曬到啲鮑魚黑哂。而根據蔡思貝定理，貝貝會愛上年紀比佢大嘅元華，但貝貝不敢說。好彩元華做多佢幾千年人，一早知道「蔡思貝模式」係乜，就娶咗佢返屋企做三姨太。（編按：蔡思貝模式係來自一篇總結蔡思貝參演大台劇嘅潮文，都係我寫嘅，科科）
元華有四個女，就係做《四個女仔三個bar》嗰四個女仔飾演。不過屋企家傳金鮑魚只得三隻，所以呢套劇叫「四個女仔三隻鮑」。由於唔夠分，呢四個女為咗爭金鮑，就展開咗一場風暴！觀眾可以用TVB fun，晚晚估邊個女唔係親生（贏咗可獲得足金膠猴／足金膠魚）。大女陳凱琳喺廁所偷聽到，其實本來三隻金鮑係夠分，但因為多咗一個唔係親生女（即係冇同TVB簽經理人合約），所以就唔夠分。於是，陳凱琳就夾埋鄭嘉穎，搵私家偵探調查。
調查期間，雖然鄭嘉穎已有宿世姻緣之妻元秋，但亦都同陳凱琳擦出愛火花，大玩叔侄忘年婚外情禁戀，可謂緊貼最新《性在有情》嘅破格，仲會加入親情同《真情》元素，變成《性在真情》。二人調查下發現，原來陳凱琳先至唔係元華個女，而係拿督個女（怪唔之得個樣鬼鬼地）。陳凱琳為咗唔畀人知，就同鄭嘉穎一齊守住個秘密。
為咗拖多幾集，呢套劇又會加入《巨輪》人馬，講蕭正楠呢個餅鋪老細，會同洪永城一齊爭翠如BB，而唐詩詠會同馬國明一齊結婚生仔幸福到老。又為咗要再拖多幾集，阿田就改為同「一線鮑魚」嘅店長麥包一齊，加入埋《愛回家》麥包經營海味舖嘅元素，真係梳化服同景都可以慳返，套劇一度想易名變成《愛巨輪之四個女仔三個鮑》。但因為網民大力反對，所以最後改唔成。
可惜世事總係無咁容易，第五集開始「御用小三」李佳芯奸角突入，勾引元華想做四奶奶，李佳芯屬於整餅嗰邊家族，佢野心好大條腿又好長，想溝咗元華入主一哥鮑魚，獨霸整條皮蛋薑鮑魚月餅生產線。李佳芯又喺廁所偷聽到，陳凱琳同鄭嘉穎講佢唔係親生（唔好問點解佢地一齊去廁所），從而想破壞佢哋關係。
為咗要再拖多幾集，麥包無幾耐就死咗，同阿田人鬼情未了，變成《鬼同你MC》 ( make cake，整餅呀唔識英文）。佢哋嘅食品大受歡迎，於是開咗「麥cafe」賣「麥鮑魚」，仲推出「shake shake鮑魚」。唉，是旦啦。而陳凱琳為咗跪求李佳芯唔好爆秘密，就表演拿督女食泥，仲畀麥包睇到，變成《鬼同你食泥》。
講講嚇就到第一千五百集，結局會以穿越時空加綁架作結，向大台劇致敬。呢套劇劇情豐富，如果一生人只需要睇一套劇，一定係呢套！《溏心風暴之四個女仔三隻鮑》，一套你一生人必定唔可以錯過嘅劇！
Well，由於劇情太豐富，太多人物，C 9 睇唔明，最後呢套劇改為星期六日連播兩集，希望快啲播完一千五百集。