影相，系男人嘅地獄，如果你系攝影師，可以跳過，篇文只適用於被折磨過嘅普通男人。你哋最高記錄試過俾女朋友彈過幾多個鐘？
阿強同我講，佢試過同一個位置，連續影咗十三次，最後佢女朋友Mary用一個將就嘅語氣話：「好過之前少少，勉強收貨啦！」對男人講，要幫女朋友影一張滿意嘅相，仲難過考高考……
一張相有幾多學問？你上攝影論壇，大把討論同研究俾你睇，但原來影女朋友，就同服務客人一樣，一個男客，一個女客，肯定系女客麻煩得多。
影相，講三樣嘢，相機、技術、物件，大師級，除咗相機勁，技術好之外，最重要系識得搵好題材，偏偏同女朋友影相，就系限死一個題材。真人靚過上鏡，以前可能系好事，但如果你要同一個真人靚過上鏡嘅女朋友影相，就好大件事！
你唔會明，一個女仔點解會花幾個鍾去化妝；就如你唔會明，一個女仔可以花幾個字去自拍一樣，佢哋講求角度，高抄，唔好有雙下巴；側少少，塊面睇起上嚟瘦；同時間要就返佢哋想show off嘅嘢，例如風景、禮物、食物等等；完成後，仲有大量後期製作，例如加特效，修圖，加字，拼相等等。
所以，幫女朋友影相，絕對需要收費，因為佢哋比起廣告客不遑多讓。平時一個攝影師對個客，會二話不說，你咁搞法，最少要收你1000蚊，只可惜，每一次同女朋友出街，你唔駛俾埋對方錢已經還神，你仲想收佢錢？除非你痴Q咗線。
有句嘢可能好多男朋友都想講，不過無勇氣講：「免費嘢，系咁上下啦。」
所以，對於一班唔識影相嘅可憐蟲男朋友，小編有以下三個忠告：
1、將勤補拙，影多幾張。人有時在乎過程，再完美嘅嘢佢哋都唔會第一時間同意，硬系要試多幾張，見女仔買過衫你就知。
2、沉默是金。阿強同我講，有一次佢唔小心講咗句：「系靚嘅亂咁影都靚啦！」佢講緊個景，點知就俾人對號入座，所以千祈唔好有任何怨言。
3、假！假！假！打死都話好靚，千祈唔好笑，千祈唔好講真話，儘量保持心境開朗。
如果有個女朋友攝影課程，小編應該第一時間會報名，錢嘅嘢，唔慳得。我知大家實會講：「阿King你邊有女！！」嗱，我都同你哋講，依家你無，但你將來一定會有！（如果有的話…）