（左）糉雞蛋仔 HK$28：以為蝦米、臘腸、乾瑤柱、鹹蛋黃配雞蛋仔會好怪，原來味道出奇地搭配，尤其大大粒臘腸或鹹蛋黃就特別好味道。／（右）即叫即製落足料炮製，這底積及橙朱古力雞蛋仔就加滿了朱古力，記得新鮮出爐趁熱食。
今年端午節你食咗幾多隻糉？我一定多過你，因為單係今日我已經食咗20幾粒！可能你會話：「糉嘅量詞點會係粒呀？」信我啦！太子弼街近新世紀廣場扶手電梯附近的Modos雞蛋仔專門店，於農曆5月期間就推出了只此一家的糉味雞蛋仔，真材實料有齊蝦米、臘腸、乾瑤柱、鹹蛋黃4種餡料，逐粒逐粒食落肚，獨食一底都唔怕滯！
積及橙朱古力雞蛋仔 HK$23：點會賣焗燶了的雞蛋仔給你？黑色的都是融化了的朱古力醬，味道超濃郁，小朋友最鍾意。
除了糉味雞蛋仔之外，仲有斑蘭、蜂蜜、甜薑、鳳梨酥、積及橙朱古力等口味，鹹味一樣有芝士、羅宋湯等選擇，就算要排長龍慢慢等都忍唔住想試多幾種味。羅宋湯雞蛋仔味道最香濃，罐頭湯的香氣令人分外有親切感，鹹鹹香香，如果食中粒有牛肉的雞蛋仔簡直有中獎的感覺。
香濃羅宋湯雞蛋仔 HK$23：貨真價實大大粒牛肉作餡料，試過才發現雞蛋仔配羅宋湯竟然好Match。
論驚喜，流心蜂蜜雖然及不上鹹味系列，不過根據現場觀察卻發現最受歡迎，事實上蜜糖配雞蛋仔的確好夾，食到成口蜜糖都只覺清甜而不會感到膩滯，值得一試。至於招牌積及橙朱古力味驟眼睇以為焗燶了，睇真啲原來全部都是融化了的朱古力，喜歡重口味就要試試。
流心蜂蜜雞蛋仔 HK$23：每粒雞蛋仔都包裹著蜜糖爆珠，輕輕一咬即有爆漿流心效果，是其中一款人氣口味。
究竟香港人有幾鍾意食雞蛋仔？有圖有真相，下晝3點都大排長龍，想食就要畀少少耐性慢慢等。