《紅van》一戲令大埔華輝冰室紅上加紅,
亦令openrice班食家多左個借題發揮機會,
個個華輝post都有提《紅van》,
寫到2016年4月仲寫緊。老套兼行貨。
一間只有蘋果批同奶茶水準較正常既茶記,
竟然都值得吹捧。
乜都話狗也不Hi既高登仔, 學下人地咁知足啦。
曾幾何時, 身為大埔L既我 ,
每星期六都會搭呢架車既回程,
直達太子金華門口, 嘆下午茶。
除招牌菠蘿油外、
墨西哥包、雞尾包、蛋撻、燴汁豬扒飯、炸雞翼、奶茶都唔錯,
周身都係刀。
不過, 已係五年前既事喇。
聽聞以前個麵包師傅已退休,水準已回落。
菠蘿油個皮仲算 Keep到,
厚度適中, 鬆脆, 牛油香夠, 亦唔會太甜。
但個包已唔係以前軟熟得黎又有質感既真波。
就算係遇岩出爐, 都只係整形整得較好既莊c敏波。
而蛋撻水準就變到好海鮮。
雖然個皮都係差以前少少,
但狀態好個日, 蛋香係世界級, 新華都無得比,
更唔好講祥香、奇興、檀島、泰昌喇。(只就蛋香而言)
不過,平均兩次會有一次食到有酸味。
痴線, 點食
繼燒鵝、叉燒、雞蛋仔、蛋撻之後, 連菠蘿油都已正式沒落。
而家淨底既優質食店, 師傅大多數都年紀偏大，
究竟, 十年之後 , 出街仲會唔會有好野食?
平心而論, 今日既金華菠蘿油,仍係茶記平均水準以上。
大家唔好因為放唔底食店以前既光境, 而對今日既評價額外扣分。