上次食左米芝蓮推介既羅勒印度餐廳,
今次食返較常去個間。
其實每碟咖哩既價錢同羅勒差唔多,
但份量就接近有1.5倍。
(牛油咖哩雞)
牛油混入咖哩中,面頭再加上奶油,
各香味撞埋一齊,好過癮。
個人認為,食呢款咖哩,最好要求走辣,
因就算叫小辣,都足以令條脷痺痺地,
食多幾啖麻木左之後,就會開始感覺唔到牛油香。
雞肉肉質亦算唔錯(以印度咖喱黎講)
(原汁咖哩牛腩)
比咖哩雞更濃,
蒜、洋蔥等香料香更重,帶微酸。
牛腩牛味唔算好出,但夠淋。
(原味烤餅，芝士烤餅)
餅質鬆軟得黎有彈性,煙煙unun。
芝士烤餅中,更混入半溶芝士,
食既時候,會一口一口咁拉出芝士絲。
表面上好精彩,但食落就有d迷惘,
因若點咖哩食唔算好襯,但就咁食又寡左d。
總括黎講,
無論價錢同肉質,呢度都贏羅勒,
係環境差d。
而咖哩汁方面,兩間各有千秋。
呢度會濃厚d,
但少左羅勒個種,咖喱中帶奶香、茄酸既明顯層次感。
所以食到尾段,味蕾適應左後,會覺得單調。
當然,食印度咖哩,會以香濃稍為行先。