《美國隊長3》上映至今大受好評，電影內嘅英雄角色全部都人氣急升，星光熠熠耀「漫威」，好多人更認為本片系近年最成功嘅英雄電影之一。小編突發奇想，廿幾年前港產片也出過一套《超級學校霸王》，群星扮演街霸角色都好有睇頭。
如果《美國隊長3》有港產片版拍，英雄選角就盞鬼喇。Iron Man由Eric Kwok扮演系鐵膽唔使猶豫：
而其他人選小編有以下選擇，大家又幫手諗下：
美國隊長
候選人1劉德華：劉華都算系凍齡型佬，同戲中嘅美國隊長可以話系叮噹馬頭。
候選人2彭于晏：近年經常接拍港產片嘅台灣型男彭于晏，同樣有壯闊嘅胸肌加埋殺死人嘅笑。
蜘蛛俠
候選人1原島大地：同新蜘蛛俠Tom Holland一樣，小鮮肉，唔使解釋。
候選人2關禮傑：劇集《叛徒》中展示過「世界級跨樓跳躍」，似足蜘蛛俠飛檐走壁。
鷹眼
候選人1苗喬偉：同鷹眼一樣曾經退過休又復出，而且仲鍾意打Golf。
候選人2馬德鍾：拍《西遊記》做二郎神第三隻眼夠精靈。
黑寡婦
徐子珊：劇集《神槍狙擊》中嘅徐子珊有「疑似」不死身，可能系因為同黑寡婦一樣咁好身手。
【同場加映】《美國隊長3》外，其他Marvel《復仇者》系列角色候選人：
羅仲謙 飾 綠巨人：理由系爆肌、爆肌同爆肌！
石修 飾 洛基：劇集《隔世追兇》入面施展「神級催眠法」，催眠能力就同洛基有得揮！
你仲有無其他心水港產「漫威」人物啊？ 有嘅話就喺評論度同大家吹下啦！