話說最近公司要請人，HR姐姐每日都忙住約人上公司面試；本來打電話約面試係一件普通不過既事，但今日聽到HR姐姐同個應徵者講完電話後係自己個位大叫：
「而家啲人究竟係來搵工定做股東？!」
最近因為太多電話騙案，搞到好多人都唔肯接電話，HR姐姐打十個電話都未必有人聽，唯有好灰咁直接留言叫人覆電話。一齊都係好正常，直到公司電話響。。。
「喂！你哋頭先係咪打過來！」
「Hello，你好，請問搵邊位？」
「嚇！搵邊位？我唔知喎，我問你哋係咪打過俾我，我岩岩聽到留言，話約面試，所以覆返你哋電話。」
「哦。。。明白，小姐請問全名同電話幾號?」
「我係李XX，電話係………」
「李小姐，你好，係呀無錯，我哋係CC行，收到你封求職信，想約個時間同你面試架，請問星期五上午你有冇時間？」
「等等先，我想知你哋公司叫咩名?」
「CC行」
「咁你哋係請咩職位?」
「Admin assistant」
「哦！咁你哋公司係邊區，可唔可以電郵介紹一下你哋公司個架構同發展前景，我想知多少少；同埋個job duties係咩可唔可以寫埋，我唔係好清楚，想睇下了解下係咪岩我做。」
「我哋公司係做食品貿易，如果你想了解多啲，可以上我地公司個網睇下 ，至於job duties，你可以參考返我哋係求職網站個post。」
「咁樣呀，其實我都可以來面試左先，但你可唔可以電郵個地址俾我，我係街唔係好方便。」
「李小姐，咁星期五早上你可以上來？」
「不如你寫幾個時間俾我揀，我睇下邊個時間方便啲再覆你。問多次你哋公司叫咩呀？我聽得唔係好清楚。」
如果你有份工，睇完以上對話又唔覺有咩問題既話，恭喜你，你既公司同你係絕配，要好好珍惜，千祈唔好走人唔撈。........................................