同朋友或另一半嗌交，喺日常生活中總系難免，但要懂得嗌、將大事化小，或搵到解決方法，先系嗌交嘅藝術，針對不同星座，策略都會有所不同：
同白羊座嗌交
白羊座衝動又意氣用事，好容易發脾氣，一嗌起上嚟就好似噴火咁，一輪嘴將不滿講哂出嚟。而且白羊座一定要嗌贏，否則唔會罷休。其實對住白羊座，就由得佢發嚇脾氣，切忌火上加油，因為佢發泄完就冇事。
同金牛座嗌交
金牛座一嬲起上嚟，其實唔太識用言語去表達，所以好多時都系谷住道氣，與其話嗌交，佢可能系唔睬你。對於金牛座，要慢慢安撫，俾啲美食或擁抱佢，等佢感受到你嘅關心，自然下咗啖氣。
同雙子座嗌交
同雙子座嗌交，真系視乎你自己本身口才好唔好。雙子座嗌起交上嚟，其實無咩焦點，東拉西扯，有時講嚇就算，甚至佢會幾無賴，所以對住佢，認真就輸了，當作系另類溝通方法就得啦。
同巨蟹座嗌交
同巨蟹座嗌交，實在有啲痛苦，因為巨蟹座情緒一爆發，真系唔系簡單，可能會大哭大鬧，又可能會黑你面乜都唔講。其實對巨蟹座，唔系要講道理或誰對誰錯，只要向佢表明你嘅關心、聽佢發嚇牢騷就得。
同獅子座嗌交
獅子座發脾氣，就好似獅吼咁，而且佢總系覺得自己高高在上，有佢講冇你講。同獅子嗌交，最忌硬碰硬，當佢發完脾氣，當氹細路咁氹佢，贊嚇佢，好快就冇事，轉頭佢又對你回復熱情。
同處女座嗌交
對住處女座，其實唔算系嗌交，因為佢只是會羅羅嗦嗦碎碎念，語氣唔會好重，但可以好刻薄。而且佢又有好多道理，沒完沒了。如果你已被佢念到頭痛，最好不要同佢纏落去，否則唔知講到幾時先講完。
同天秤座嗌交
天秤座最唔鍾意嗌交，因為佢只尋求和平，亦不能破壞佢優雅嘅形象。所以天秤座式吵架，其實系辯論、講道理。只要你能同樣冷靜地將不滿拎出來討論，大家好快會達到共識。
同天蠍座嗌交
天蠍座情感激烈，有時表面冷靜，但句句都會刺中你嘅死穴，有時會完全唔理你，等你嚇餐死，有時又好激動。但其實對佢嚟講，嗌交系代表彼此嘅重視，因為外人根本無法觸動佢嘅情緒。同天蠍一齊，嗌交反而系用嚟增進感情。
同射手座嗌交
射手座嗌交嘅時候，講嘢系會特別誇張，情緒又激動，好鬼戲劇化，但你打個折頭就得，唔好放喺心上，因為佢講完又當冇事發生過，唔會記住，繼續嘻嘻哈哈。
同山羊座嗌交
山羊座平時忍耐力好強，但忍得咁上下，就會爆發。當佢真系要嗌交時，就代表事情真系很嚴重，佢真系忍無可忍。不過其實山羊座實事求事，只要你都認真一啲，同佢一齊搵出解決方法就得，唔好鬥氣。
同水瓶座嗌交
水瓶座情緒冷靜又疏離，無論內心有幾激動，都系會冷漠咁同你表達同討論佢嘅不滿與諗法。對住佢，千祈唔好有情緒，因為佢會受唔到而同你切斷對話，所以只要同樣保持心平氣和，自然可以解決問題。
同雙魚座嗌交
雙魚座敏感又情緒化，嗌交嘅時候，就好似小朋友一樣，好容易就會喊（就算男仔都會忍唔住有點哽咽）、丟嘢、吵吵鬧鬧。同佢唔好講咩道理，只要俾佢好好咁發泄，再氹小朋友咁安慰返佢，好快就冇事。