最近連詩雅(Shiga)因為喺ViuTV節目《跟住矛盾去旅行》入面，用「ABC港女tone」及高八度嘅聲線同人傾計，惹嚟部份網民反感，屋漏偏逢連夜雨，呢日仲有周刊爆佢同「麻雀大王」石鑑輝家族後人石恆聰已經分咗手，結束3年情！
報道話，兩個人因為聚少離多，所以先決定分手，又話分手同「港女」性格無關，只係Shiga覺得做藝人好多嘢好難配合，對方亦唔明佢嘅工作，分手後大家已經冇聯絡，又話依家兩人都只係想努力工作！
Shiga接受訪問時，亦大方承認消息：「對於分手嘅事，其實好似我係報道入面講嘅一樣，我哋係因為聚少離多，所以大家共識咗和平分手，其實已經發生喺幾個月前，所以我依家心情都OK，多謝大家關心。」
另外，對於喺《跟住矛盾去旅行》播出後被網友批評佢為「超級港女」，Shiga就承認自己興奮時，講嘢會比較高音，又話自己由幼稚園至中學都係讀國際學校，學校一直都冇中文堂，亦唔准講廣東話，日常生活佢同女傭亦係用英文溝通，直到入行嗰陣先去讀報紙，所以依家個腦諗起英文，一時翻譯唔到，先會變成中英夾雜。