最近王浩信拍TVB劇集《EU超時任務》，繼上年嘅《樓奴》之後再次擔任男一，劇中表現令唔少人贊好。其實佢由08年加入TVB，直至近年擔正做男主角，上位速度都可以話系非常快，依家就帶大家睇下佢嘅「上位之路」啦！
入行初期（2008年–2011年）
啱啱入行冇耐，王浩信自然要由配角做起，拍咗幾套劇都未被觀眾所熟悉。雖然憑2010年嘅劇集《刑警》提名「最佳男主角」，令人開始留意到佢，但之後接連幾套劇好似《居家兵團》《換樂無窮》等都冇咩起色，可以話系沉寂嘅時期。
▲拍《刑警》時嘅王浩信，外表未成熟，但演技有驚喜。
意外爆出（2012年）－《名媛望族》
王浩信喺呢套劇入面只系配角，但佢憑住俾劉松仁狠摑13巴嘅一幕，成功掀起話題，令佢成為果期嘅熱門人物。呢件事話俾我哋知，就算俾人打都唔系壞事，少少苦楚等於激勵嘛（好似系）～
▲俾人打到「紅都面曬」，因為俾人系咁掌摑，佢亦都被人改咗兜巴信呢個外號。
街知巷聞（2013年）－《法外風雲》
唔知系咪編劇食過返尋味，呢套劇入面王浩信再次俾人安排掌摑戲份，今次仲要俾謝雪心怒摑24巴，真系睇見都覺痛。但佢就系正正憑住呢套戲拎咗「飛躍進步男藝員」，仲成為咗討論嘅焦點。唔知王浩信會唔會因此覺得捱呢24巴都系抵嘅呢？
▲俾人掌摑24巴，破曬TVB劇集紀錄。
多產時期（2014年）－《愛我請留言》《再戰明天》
呢個時期大家成日都可以見到王浩信，皆因黃金時段嘅劇集佢都有份演。而佢喺《愛》《再》兩套劇嘅演出都顯示佢演技逐漸成熟，甚至可以話水準系喺其他演員之上。《愛我請留言》入面王浩信飾演有錢型男，仲令唔少人開始欣賞佢嘅外表，一時間多咗唔少女粉絲，威！
▲《愛我請留言》入面飾演有錢靚仔。咁公道嚟講，佢本身都系靚仔嘅。
漸入佳境（2015年）－《樓奴》
終於第一次做男一，王浩信當然要好好把握機會。佢表示自己有認真鑽研點樣演好個角色，而結果套劇出到嚟，佢嘅喜劇感的確令個角色變得立體同埋討好。去到呢個時期，佢嘅演技已經得到唔少人認同，有好嘅觀眾緣亦令佢開始受歡迎。
▲《樓奴》入面王浩信演喜劇嘅天份盡現。
成功上位（2016年）－《EU超時任務》
再次做男一，王浩信今次嘅表現更加搶鏡。無論系誇張搞笑定系認真嚴肅嘅戲份佢都處理得好好，為咗角色而練嘅圍頭話亦講得唔錯。演戲成日都肯搏到盡，演技又夠曬多元化，難怪佢愈嚟愈受觀眾歡迎啦！
▲渠頭呢個角色俾到王浩信唔少發揮空間，亦見識到佢搞笑嘅一面。
王浩信依家擔正，未來一定會有更多劇集主角有佢份，鍾意佢嘅觀眾一定最開心啦！