新劇《來自喵喵星的你》拍外景，拍被胡定欣追捕場口，陳豪走到氣咳。
攰爆陳豪 當街趴地瞓陣
「多仔公」陳豪（ Moses）同結婚只有三年，密密造人！大仔梓樺（ Aiden Joshua）得兩歲，次子浩鋒（ Nathan Lucas）僅一歲，第三胎小猴 B 5月又面世，排住隊！
陳豪要照顧大肚豪嫂又要幫手湊仔，陪產前更要趕拍新劇《來自喵喵星的你》，搞到人夫冇覺好瞓，開工例遲又頹爆！
日前，劇組拉隊去上環開工，陳豪和胡定欣拍追捕場口，全程跑來跑去，爆陳豪竟然開開嚇工瞓著！
慣性遲到
陳豪去年憑《鬼同你 OT》爭視帝敗陣，今年捲土重來，原班人馬開新劇《來自喵喵星的你》。
生完又生，一於再生的陳豪，去年又搞大老婆個肚，豪嫂有咗，陳豪要幫手湊兩個仔，又要照顧老婆，去年尾拍完《完美叛侶》後，索性停工，直至上月才復出。
不過，屋企有大有細，自從做咗老豆，陳豪開工便出現慣性遲到。
「雖然有兩個工人姐姐幫手，但佢兩公婆都鍾意自己郁手湊仔，而家 Aimee（陳茵媺）又有咗，幫個仔沖涼、氹食飯之類慨嘢，都落喺阿 Mo（陳豪）身上，呢輪仲開埋劇，日日拍完十幾粒鍾返到屋企仲要做多份（湊仔），鐵人都冧所以有時佢遲到，我哋都唔出聲！」劇組工作人員透露。
___________________________________________________________________________________________________________________________________________________________
其他演員對戲，陳豪爭取時間補眠。
要湊仔又要拍劇，攰爆陳豪趴喺地下瞓著咗。
又仆又碌，陳豪賣力冇錫身。
不顧形象當眾抓下體 ！
_______________________________________________________________________________________________________________
男神形象去咗邊？
跑到氣咳
自己知自己事，捱到殘的陳豪開工出外景，自備咖啡提神。由於當日主要拍攝追捕戲份，被胡定欣追到氣咳的陳豪重複又重複拍攝又仆又碌鏡頭，攰上加攰，但他仍落足力，親自上陣，只將較危險的跨欄動作，交替身代勞。
拍到下午，轉位拍另一場陳豪被制服在地上的戲份，瞓身拍了足足三粒鍾，陳豪力不透支，其他演員對戲時，他索性繼續趴喺地，補眠瞓一陣。
晨早通告，胡定欣一下車就黑面。
胡定欣擒高擒低，冇難度！
產假前搶拍
趕戲捱到金睛火眼，因為陳豪已經拎定產假，陪生。
「阿 Mo唔想影響到拍攝進度，所以一早已經同劇組傾好，集中將自己戲份儘量喺呢段時間拍曬先，因為之後佢要陪老婆又要湊多個，周身唔得閒！」劇組人員說。
陳茵媺同陳豪都主張自己落手湊仔。
陳茵媺肚皮無休假，生完一個又一個。
就快生得的陳茵媺日前過 35歲生日，大肚壽星 po相曬恩愛。
好姊妹戚黛黛、朱凱婷等都有現身為壽星送上驚喜，二人更摸著巨肚拍照留念。
明抄
陳豪在新劇中同胡定欣做夫妻，劇情指胡定欣為女兒放棄愛貓，明抄現實中的豪嫂陳茵媺。
扮演科學家的陳豪，在劇中同視後胡定欣合演夫妻，劇情指胡定欣為咗個女，打算遺棄愛貓，明抄現實中的豪嫂，當日因懷孕棄貓。對愛妻被愛貓人士斥責，早前陳豪再度幫口：「兩睇其實我明白我太太，佢鼻敏感嚴重，食藥食得好緊要，就算唔養貓都系咁。如果冇嘢慨，當然大家（人貓）共存啦，世界大同嘛。」
力挽人氣
99年加入無線的陳豪，事業扶搖直上，是師奶殺手，港女筍盤。作品《溏心風暴》、《公主嫁到》、《宮心計》等，套套擔正，收視又好，人氣高企，廣告價亦企硬。直至 13年，陳豪與拉埋天窗後系咁生，要陪產湊 B，陳豪大量減產，曝光率不及從前，加上 15年與蓋鳴暉合作《水發胭脂》，收視差之餘，陳豪更被對手拖低，人氣急挫，為挽回一哥地位， TVB特意安排他與新一任視後胡定欣合作，助陳豪重振聲威。