「你個晚去咗邊呀?」Ceci問。
「咩呀?同你食完飯我就返咗屋企啦~」阿明似乎有啲吞吞吐吐。
「咁你呢啲咩相嚟架?」
Ceci攞起阿明手機,展示出幾張男女親密合照。
「喂!你偷睇我手機?」阿明突然間好嬲,一手搶返部手機。
「即系如果我唔偷睇嘅話,你就諗住瞞住我啦?」Ceci質問。
「我同你講咪搞到而家咁咯!我同班朋友去飲下嘢,有咩問題呀?」阿明喺度兜~
Ceci開始眼有淚光,因為佢知道呢個情景已經唔系第一次。
睇住阿明同其他女仔合照,雖然阿明多次強調只系朋友關係,但Ceci心內仍然耿耿於懷。
「點解…點解你一定要去Clubbing呢啲地方?」
「咁個到有氣氛好多呀嘛!難得唔使返工,一班朋友出嚟聚下開心咋嘛」
其實每一次Ceci偷偷睇阿明部手機,佢都有一定嘅心理準備~
佢真系好驚會睇到一啲令自己崩潰嘅對話同相片…甚至視頻…
「朋友…我已經分唔清楚你對朋友嘅定義系咩!攬埋一舊又系叫朋友?咁上埋床系咪又叫朋友呀?」Ceci終於忍唔住,將所有情緒都發泄出來!
「你都痴線嘅!你無啦啦偷睇我手機仲好講!」阿明將手機放返褲袋,準備轉身離開。
「喂!你而家咩意思呀…」
「你而家咁唔冷靜!根本傾唔到落去!」阿明轉身開門出去,拋低呢一句。
屋內就剩低Ceci一個,面對住四面牆,佢終於放聲痛哭…
好好地一個夜晚,諗唔到變成咁樣收場。
有啲時候,女仔會偷睇男朋友手機,並唔系佢貪玩、霸權,只系因為佢無安全感…
其實佢哋每次都要好似間諜咁,眼觀四方、耳聽八面、睇準時間落手。
一邊睇手機又驚睇到啲曖昧嘅對話、合照、視頻,一邊又驚對方突然行出來識破一切…
有理由相信,呢個並唔系一件好玩嘅事。
或者佢嘅方法系錯嘅,或者佢真系有啲執著,但系因為太在乎一個人,太愛一個人,所以…佢!要!偷!睇!你!手!機!