分咗手仲做唔做到朋友呢？要做實做到嘅，但未必系即時咯。可能系一個月後、一年後，或者系各自都有一段新嘅感情之後。Ex系一個好特別嘅角色，你哋曾經好親密，但今時今日分分鐘比陌生人更陌生。愛情不再，大家見返面果陣會點應對呢？憎一個人，會令自己耿耿於懷，會唔開心，所以大家嘅終極目標相信都系「放得低」。如果「再見亦是朋友」系終極大佬，咁你而家去到邊個Level？
1. 兜路走 (難度：N/A)
完全未Ready再見返哩個人，或者俾對方見到自己，所以都系唔好撞到最好！
2. 遠遠觀望 (難度：★)
仲會掛住，離遠睇嚇對方生活得開唔開心繫你唯一可以做嘅嘢，見面就仲未得～
3. 直行直過當時運高睇唔到 (難度：★★)
可以見面，但唔好有任何交流啦好嘛？
4. 打電話扮忙 (難度：★★)
有禮貌地Say個Hi，不過停低講嘢可以遲啲先～
5. 點點頭微笑 (難度：★★★)
你Ready打招呼，但未可以做主動。
6. 高八度Say Hello (難度：★★★★)
完全Ready，可惜仲有少少緊張，高八度可以暫時遮掩你嘅不安。
7. 得閒飲茶 (難度：★★★★★)
講到飲茶，應該都已經傾咗好幾句。雖然系客套說話，都算系話俾對方聽，唔抗拒做返朋友咯。
8. 再見亦是朋友 (難度：YOU WIN！)
所有相識相知都系緣份，做唔成戀人都可以做朋友。因為有佢，先有今日嘅你吖嘛！
當然，你亦可以選擇分手之後直接從你嘅人生剔除哩個人，只要你覺得咁樣令你最舒服就OK。
分手會痛，會唔開心，會突然覺得生命缺少咗一部分，但你會搵返架！