結婚嘅嘢搞到人到癲!!BB冇咗,老公都冇埋。。。

rainbow | 2017-08-12| 檢舉

因為有左BB,所以結婚!傾好左68K禮金,男家話唔識,所以餅卡酒席嗰D都唔洗男家比,我地女家自己比錢就可以!

本來女家想分開擺酒,但男家話佢地鄉下唔會分開擺酒,所以就擺聯婚!

男家諗住擺酒比曬錢埋單,但因為男家得8圍,女家就25圍,女家怕男家開支太大,所以決定男家幾多席就比幾多圍,女家都係! 但籌備婚禮過程好多爭拗.

男家話要返大陸擺酒,但係食餐飯就算,唔洗請女家親戚,新娘去就得!個日子定左係香港擺酒前1個月,已經同男家講過,如果定左日子,就算唔請女家去,都要通知女家人,以示尊重,但男家最後都無通知過女家幾時擺酒!

男友話當返去同親戚食飯, 但要拜祠堂同著裙褂, 我唔肯, 裙褂淨係可以著1次,同香港都未出門,點解要去人地祠堂度拜!!

解釋返比男家知,但最後既回覆係 我地女家 麻X煩!

因為我地女家出嫁要跟足傳統拜神,所以唔可以入人祠堂拜,就算要拜都要等出左門先返去拜! 最後要我呀嫲出動解釋, 男家先話唔洗拜,當返去食飯就算!

到傾香港酒樓細節時,我媽話男家要包埋女家一圍主家席,

但男朋友話之前講禮金時無話要包酒席,點解而家又話要包一席,更何況之前話明男女家自己開幾多圍自己比返, 但點解而家話要包?

我媽解釋要男家包一圍既意思係,當個女婿請外父外母食飯咁解!

但男友已經講到明話唔會包我地主家席! 已經令到關係好僵! 最後我父母話,男家唔比既話我地自己比返無問題!

到我媽同我去睇嫁妝睇龍鳳床單,男友陪埋我去,我媽話買套$1000既,但我覺得$1000買套紅色既床單用1排就唔會用會太貴,所以買左套200蚊既紅色床單套裝就算!

點知男友知道左後好嬲,佢以為我會買1000蚊嗰套!之後解釋返比佢,佢就話我女家貪錢,話左買1000蚊既床單,而家變左200蚊,禮金就識收,但錢就唔用………

仲話男家買幾多金器,女家唔可以小過男家,以示公平!我嬲到唔敢話比屋企人知!

以為大家好快成為夫妻會好易話為,但點解買套床單,可以變到咁? 嫁妝係女家送比新娘既心意,點解男友要牽涉女家買D咩送比我?

我地仲有為左好多事而嘈,積積埋埋而有抑鬱症,仲控制唔到打自己個肚,

去睇醫生,叫我同男友傾下,我叫男友遷就下我,大小化小,唔好嘈交,但男友都覺得係無問題。

(我無話比佢知我失控打自己)。

到最後我忍唔住,係返大陸擺酒前一星期,我將禮金交返比男友話我唔結婚,我寧願唔結婚,都唔要成日吵罵! 已經因為鬧交而作小產過幾次,我已經忍夠!

退婚後,男友父母都打來,叫我唔好唔結婚,因為佢地已經派曬D帖,唔結婚會好無面,但我堅持,因為我要保住我身體健康, 男友爸爸再話如果唔結婚都唔緊要,佢已經有2手準備通知客人,唔結婚蝕底果個會係我!

無幾耐 我個肚開始痛,去睇醫生話唔健康,所以唔要得,要食藥排BB出來……..

就係咁,我係短短半個月失去左BB同我男朋友! 我知我男朋友好愛我,但唔結婚我係唔係做錯左??

via:http://www.discuss.com.hk/viewthread.php?tid=24491095&page=1

來源:www.discuss.com.hk